Vennskap Jeriko-Lærdal

Invitasjonen frå Jeriko er komen –
og arbeidet er i gang også med å organisere ein tur til Jeriko

Tur til Jeriko til 10 000 årsfeiringa som startar 10. oktober 2010 klokka 10.00 er under planlegging.

Styret har i arbeidsåret 2009 vore samansett slik:
Anna Jorunn Avdem (leiar)          vara : Kristin Bolstad
Arne Sanden (nestleiar)                  vara: Eva Hage Solstad
Olaug Skjerdal (skrivar)                  vara: Lars Petter Nesse
Marianne Voldum (kasserar)       vara: Margunn Thue
Brita Einemo (styremedlem)        vara: Jarle Vindedal

Ordførar Arne Sanden og formannskapsmedlem Olaug Skjerdal med varafolk er innvalde frå Lærdal kommune, medan Brita Einemo, Marianne Voldum og Anna J. Avdem med varafolk er valde inn i styret av årsmøtet i Vennskap Jeriko-Lærdal. Valnemnd er Atle Hunderi og Sissel Aarethun. Ingrid Hauge er revisor. Laget har i 2009 om lag 100 betalande medlemmer.

Året 2009 fekk ein dramatisk start. Israel sin krigsmaskin rulla rett før nyttår inn over Gaza og bomba vegar, hus og menneske på den innestengde kyststripa sønder og saman. Bileta frå krigen og telefonsamtalane med Jeriko skipla julestemninga i stovene våre, og på den tredje dagen sende Mads Gilbert årets mest vidgjetne sms: “Melding fra Palestina: Takk for all støtte. De bombet det sentrale grønnsaksmarkedet i Gaza by for to timer siden. 80 skadde, 20 drept, alt kom hit til Shifa. Hades! Vi vasser i død, blod og amputater. Masse barn. Gravid kvinne. Jeg har aldri opplevd noe så fryktelig. Nå hører vi tanks. Fortell videre, send videre, rop det videre.  Alt GJØR NOE! GJØR MER! Vi lever i historieboka nå, alle! Mads G. 3.1.09 13.50 Gaza , Palestina.”

Etter dette greidde vi ikkje å sitja i ro lenger. Den 6.januar arrangerte sogndølene fakkeltog til støttefor folket i Gaza, og mange lærdøler var med der. Kvelden etter var det vår tur: Vi tende ei flamme som skulle brenna på ubestemt tid utanfor rådhuset attmend skiltet med teksten FRED I PALESTINA -Vennskap Jeriko – Lærdal. Trass i at markeringa var organisert på svært kort tid, var omlag hundre menneske til stades og høyrde appellen frå ordførar Arne, helsingar frå Jeriko ved Anna – og ikkje minst trompeten til Siv Hovland då ho spela Vitae Lux – Livets lys, livets håp – i den kalde vinterkvelden. Det var ei sterk stund, vi samla spontant inn 8.085,- kroner som vi sende til Norsk Folkehjelp sitt arbeid i Gaza. Flamma brann utenfor rådhuset i vekevis. Den 15.januar arrangerte dei Lysvake for Gaza på Årdalstangen, og Anna heldt appell der.

I desse januardagane tok vi i VJL initiativ til ein felles aksjon mellom dei norske kommunane som har vennskapssamband i Palestina. På få dagar gjekk e-postane på kryss og tvers i Norges land, og den 8.januar gjekk det ut eit felles opprop til den israelske ambassaden frå ordførarane i Stavanger, Trondheim, Tromsø, Hamar, Sarpsborg og Lærdal, der dei instendig bad Israel stoppa krigføringa i Gaza. Dei fekk eit svar frå ambassaden den 23. januar. Dette oppropet viser klart kva potensiale og kraft som kan liggja i felles aksjon mellom oss vennskapskommunane, så dette bør vi absolutt utvikla vidare.

Alt før jul hadde vi teke til å planlegge ein ny tur til Jeriko, men Gaza-krigen gjorde at vi måtte legge desse plananae på is. I staden valde vi å lage ein palestina-kveld, og den 4. mars kom Mads Gilbert til Lærdal. Under tittelen Eit augevitne fortel trollbatt han ein full kultursal med ord og bilete frå Gaza-krigen. Dette vart i tillegg ein flott kulturkveld der Lærdal Musikklag og mange flinke lærdalsungdommar medverka med song og musikk. Rolf Jerving var programleiar, og  Wiam Erikat helsa forsamlinga i opptak frå Jeriko. Vi samla inn kr 22 500,- til NorWac sitt hjelpearbeid i Gaza. Takk til alle som stillte opp og gjorde kvelden til ei uforgløymeleg oppleving.

Også i år deltok vi på Lærdalsmarknaden med bui vår i tradisjonell stil, og på laurdagane i sommar heldt dugnadsgjengen med med Ingrid Hauge i spissen, Jerikobui open i Eldhuset. Også under Haustmarknaden kunne folk handle i Jerikobui, og no i adventstida kan palestinavarene frå Jerikobui kjøpast på Julemarknaden i dei tome KIWI-lokala hjå Lindstrøm. Styret takkar Edbjørg Holte på Al-Quds i Oslo som velvillig held oss med varer i kommisjon. Takk også til Ingrid og alle andre som stiller opp i bui, slik at vi på denne måten kan selja produkt og gjera vennskapet med Jeriko synleg, både for fastbuande og tilreisande.

Veka 17.-24.oktober var så tida mogen for ein ny Jeriko-tur. Tolv spente lærdøler fekk denne gongen høve til å vitja vennskapsbyen, og Arne Sanden var den fjerde ordføraren frå Lærdal som no kunne besøkja vennskapsbyen! Arne og Iren, Rein Arne og Berit, Lasse og Aud, Bente, Marianne, Thomas, Jostein, Mari og Anna fekk alle uforgløymelege dagar i Palestina. Det er fantastisk å koma til Jeriko og ha så mange gode venner og bli motteken med ein gjestfridom og ein hjartevarme som ein knapt opplever annan stad. Dess større blir kontrasten ved å oppleva stadig nye og større israelske busetjingar rundt byen, sjekkpunkta og muren som deler landet i to og lagar utålege barrierar. – Dei tolv som reiste denne gongen, skulle forutan å representera Lærdal og utvikla kontakten mellom skuleborn og andre innbyggjarar, prøve å komea vidare med planlegginga av Lærdal sitt bidrag i samband med 10 000-årsfeiringa til Jeriko, verdas eldste by. Dette arbeidet må halda fram i 2010, og då satsar vi på besøk frå Jeriko til Lærdal til sommaren. Så vonar vi det store jubileet kan feirast med brask og bram i 2011, og at mange lærdøler får høve til å vera med på det ærefulle oppdraget.

Langhelga 5.-7.november var laget invitert til Stavanger for å feira 25-årsjubileet til Stavanger – Nablusforeningen. Frå Lærdal var det berre Anna som hadde høve til å reisa, og ho hadde føredrag om vennskapsarbeidet i eit fredsperspektiv. Feiringa vart lagt opp som ein jubileumskonferanse, der også vennskapskommunane våre frå Palestina og andre interesserte var inviterte. Frå Jeriko var det såleis Wiam Erikat som var til stades.

Vi har dessverre ikkje fått tid til å laga ferdig boka om vennskapsarbeidet. Men Gerd Berit Tønjum arbeidar systematisk med arkivet vårt og legg dermed eit flott grunnlag for skrivinga. Takk for det. Nemnda har også samla bilete frå turar og besøk, og vi har drøfta stoff og opplegg med Wiam og dei andre i Jeriko når vi har vore i lag. I nemnda sit Bente Opsvik, Jan Olav Fretland og Anna Avdem. Vi har heller ikkje fått opp den nye heimesida vår enno. Men arbeidet er i gang og må framover ha høg prioritet. 

I 2009 har styret hatt 8 vanlege styremøte. I tillegg har styret sjølvsagt nytta seg flittig av telefon og e-post, særleg i dei hektiske periodane. Styret takkar alle medlemmer og andre som hjelper til med små og store tenester. Vi takkar også kvarandre for eit godt og gjevande samarbeid i året som er gått og ser fram til Jeriko-besøk og andre spennande oppgåver neste år.

Lærdal, 2.desember 2009
For styret i Vennskap Jeriko- Lærdal
Anna Jorunn Avdem

Jeriko by feirar 10 000-årsjubileum i 2010.
Feiringa skal føregå i oktober, og i det høvet ynskjer Vennskap Jeriko-Lærdal å reise til Jeriko og vera med og markere jubileet.
Dette kan me gjera på ulike måtar, naturleg vil vere å ha ei kulturutveksling i ei eller anna form.
Me vil at medlemene, og andre interesserte, skal få høve til å vera med på feiringa av jubileet, anten ved å vera med til Jeriko, eller på andre måtar.
Anna Avdem og Tom Karlsrud reiser til Jeriko i slutten av april, for å starta planlegginga i lag med kontaktane våre der.

Jerikonemnda ber medlemene i laget, og andre som har interesse, inn til møte, for å koma med innspel til og planleggja vårt bidrag til jubileet.

Møtestad er Lærdal rådhus.

Tid Onsdag 7. april kl 19.00

Jerikonemnda

VENNSKAPSKOMMUNEN JERIKO
Jeriko kommune i Palestina er vennskapskommunen til Lærdal. Den første kontakten mellom Jeriko og Lærdal blei gjort i 1997. Under Lærdalsmarknaden i 1998 vart avtalen underskriven i Kvammegården av dei to ordførarane.

Avtale om venskapssamarbeid mellom Jeriko og Lærdal

Føremålet med denne avtalen er å utvikle venskapleg samarbeid mellom dei to kommunane Jeriko og Lærdal og deira innbyggarar. Aktuelle samarbeidsområde kan vere kultur, turisme, handel, landbruk, industri og andre menneskelege og sosiale forhold. Denne avtalen trer i kraft når den er stadfesta og godkjent av dei to kommunestyra og underskriven av ordføraren i Jeriko, Palestina og ordføraren i Lærdal, Norge.

Lærdal, 20. juni 1998
Hans A. Tønjum           Abed Al-Karim Sidr      

Vennskapsarbeidet blir no drive av organisasjonen Vennskap Jeriko – Lærdal, som vart stifta 6. april 2000. To av styremedlemene er innvalde frå kommunen, dei tre andre frå medlemsorganisasjonen.

Jeriko
Jeriko er ein grøn oase i Jordan-dalen og blir gjerne kalla Palmebyen. Byen ligg 10 km nord for Daudehavet og 30 km aust for Jerusalem. Jeriko ligg 250 meter under havnivået, og har eit klima med varme somrar og milde, solrike vintrar.
Jeriko er ein jordbruksby, særleg kjend for å produsere fine sitrusfrukter, dadlar, bananar, blomster og vintergrønsaker. Det gode klimaet har óg gjeve grunnlag for turisme i uminnelege tider.
Jeriko er rekna for å vere verdas eldste by, dei eldste utgravne ruinane er 10 000 år gamle. Dei eldgamle bymurane og restane av Hishams palass er mellom dei fremste reisemålet for den som kjem til Jeriko, men byen har også mange andre viktige historiske stader, ikkje minst kjende frå Bibelen. Framleis står morbærtreet som tollaren Sakkeus klatra i. Like ved Elisjas kjelde, – kjelda som profeten Elisja reinska kan ein ta taubane opp til Fristelsens fjell, sjå klosterkyrkja der og nyte utsikta over byen og omland. Elles Jesus sin døypestad ved Jordanelva, og på veg til Dødehavet kan ein oppleve Dier hajlah eller St.Georgs kloster og mosaikkarbeidet der.
Elisjas kjelde gjev byen både drikkevatn og mykje av vatningsvatnet.  Vassressurssane er trua.
Det bur om lag 45.000 menneske i Jeriko, om ein reknar med landsbyane omkring og dei to flyktningeleirane.
Jeriko var den første palestinske byen som fekk sjølvstyre, i 1994.
 
Vennskap Jeriko – Lærdal
Organisasjonen Vennskap Jeriko – Lærdal vart stifta 6. april 2000, har omlag 100 medlemmer og er medlem av organisasjonen Nord-Sør.
VJL er ein partipolitisk og religiøst nøytral organisasjon som byggjer på intensjonane i vennskapsavtalen mellom Jeriko og Lærdal som vart underskriven av ordførarane 20. juni 1998.
Gjennom reiser og utveksling av erfaringar og kunnskap på ulike område, skal ein arbeide for å utvikle mellommenneskelege forhold og forståing mellom to ulike kulturar.
 
Kva gjer vi?
Utdrag frå VJL si årsmelding 2009:
Året fekk ein dramatisk start då Israel rykka inn over Gaza rett før nyttår og bomba vegar, hus og menneske på den innestengde kyststripa sønder og saman. Bileta frå krigen og telefonsamtalane med Jeriko skipla julestemninga i stovene våre, 3. januar 2009 sende Mads Gilbert årets mest vidgjetne sms.
7.januar vart det tendt ein flamme som skulle brenne på ubestemt tid utanfor Rådhuset, skilta med teksten FRED I PALESTINA – Vennskap Jeriko-Lærdal. Mange frammøtte fekk høyre appellar, helsingar og trompetspel. Innsamling til Norsk Folkehjelp i Gaza.
VJL tok initiativ til ein felles aksjon for norske kommunane med vennskapssamband i Palestina.
8.januar gjekk det ut eit felles opprop til den israelske ambassaden frå ordførarane i Stavanger, Trondheim, Tromsø, Hamar, Sarpsborg og Lærdal der dei innstendig bad Israel stoppe krigføringa i Gaza.
 
Gazakrigen gjorde til at ein planlagd Jeriko-tur måtte utsetjast, istaden laga VJL ein Palestina-kveld 4.mars der Mads Gilbert trollbatt ein full kultursal med “Eit augevitne fortel”. Wiam helsa forsamlinga i opptak og Musikklaget og flinke ungdommar underheldt. Det vart også samla inn pengar til Norwac sitt hjelpearbeid.
 
Jerikobui var open under marknadane og laurdagane i juli og august.
 
Det viktigaste i vennskapsarbeidet er at folk frå Jeriko og Lærdal kan møtast, bli kjende med einannan og utveksle erfaringar med kvarandre.
I oktober 2009 var 12 lærdøler på viting i Jeriko for å utvikle samarbeidet og planlegginga av Lærdal sitt bidrag i samband med 10 000-årsfeiringa til Jeriko, verdas eldste by.
I året som kjem er det planar om vitjing frå Jeriko og til Jeriko.
 
VJL informerer i Helg & Kvardag og i lokalavisene. Alle medlemmene mottek bladet “Vennskap Nord-Sør” og anna informasjonsmateriell frå VNS. Det vert arbeidd med ei bok om vennskapsarbeidet og eigen heimeside.

Har du spørsmål til VJL eller lyst til å vere med på dette, så ta kontakt! –
Medlemsskap
Enkeltpersonar, lag, organisasjonar, bedrifter og institusjonar kan melda seg som medlemmer av Vennskap Jeriko – Lærdal. Medlemskontingent: einskildmedlemmer vaksne kr 100, barn kr 25, verksemder/institusjonar kr 150. Bankgiro 3838.13.52398.

Leiar av organisasjonen har heile tida vore Anna J. Avdem.