Nye keramikkskåler og fat i ulike storleikar.
Nye glasvarer.
Bøker, kremar, skjerf og smykke er gode gåvetips!
Olivenolje og olivensåper er også godt å ha i heimen!

Dei kommunale representantane fyl valperioden,
dette gjeld Jan Geir Solheim med personleg vara Johan Nes har overteke ordførarklubba og styrevervet i VJL etter Arne Sanden -og Guro Eri Jakobsen med personleg vara Bente Øien Hauge har overteke etter Olaug Skjerdal.

Olaug og Arne fekk velfortent takk og keramikk for arbeidet dei har lagt ned i Vennskap Jeriko-Lærdal.

Den nydelege lasagnaen som  Brita Tønjum Einemo laga til Kulturkvelden har vore nedfrosen, den og salat og kaker var årsmøtemiddag!

Olaug Skjerdal tok ein sporty gjennomgang av bileta frå Jerikobesøket 2011, – no er alle bileta tilbake i rett rekkefølge og absolutt lånbar på ein minnepinne – om skular, organisasjonar eller andre ynskjer det!

Ingebjørg Voll gjorde oss merksame på artikkelen på verdsvevsida til  FAU på Lærdalsøyri – her er den:
http://faulaerdal.wordpress.com/2011/10/17/skulebesok-i-lag-med-besok-fra-jeriko/.

Vennskap Jeriko-Lærdal:
ÅRSMELDING 2011
Styret har i arbeidsåret 2011 vore samansett slik:
Anna Jorunn Avdem (leiar)  med  vara: Kristin Bolstad
Arne Sanden  (nestleiar)  med vara: Eva Hage Solstad
Olaug Skjerdal (skrivar)  med vara: Lars Petter Nesse
Berit Kaardal (kasserar) med vara: Margunn Thue
Bente Olaug Opsvik (informasjonsmedarbeidar)  med vara: Jarle Vindedal

Arne Sanden og Olaug Skjerdal med varafolk er valde av Lærdal kommune.
Berit Kaardal, Bente Olaug Opsvik og Anna Jorunn Avdem med varafolk er valde av årsmøtet i Vennskap Jeriko-Lærdal. Valnemnd er Sissel Aarethun og Rein Arne Golf. Ingrid Hauge er revisor. Laget har i 2011 70 betalande medlemmer.

Årsmøtet i fjor vart halde den 25. november, og arbeidsåret 2011 starta med ein vellukka julehandel i Jerikobui. Julemarknaden var i dei tidlegare KIWI-lokala hjå Lindstrøm, og der selde vi for ca. 11 000 kr. Jerikobui var elles open under Lærdalsmarknaden både i sommar og i haust, og på laurdagane i sommar, slik som før om åra. Takk til Ingrid Hauge, som også dette året tek ansvar for vakter og pengar, og til Eldbjørg Holthe på Al Quds i Oslo, som held oss med varer i kommisjon.

Den fyrste store oppgåva vart elles å setja seg inn i dei nye søknadsrutinane til Vennskap Nord/Sør (VNS). Norad-midlar fordelt gjennom Vennskap Nord/Sør er som kjent ei svært viktig finansieringskjelde for arbeidet vårt, og helga 12-13. mars deltok Berit Kaardal og Anna J. Avdem på førebuande partnarmøte og kurs arrangert av VNS i Oslo. Ei viktig side ved det nye programopplegget er at vennskapsgruppene i sør og nord skal samarbeide meir om søknaden,så frå Jeriko kom derfor Wiam Erikat og Aesha Awanja og deltok på det same kurset. Frå Oslo reiste alle vi fire damene til Lærdal, der partnarmøtet heldt fram 14.-15. mars med drøftingar av innhaldet i den felles søknaden som hovudsak. Det gav bra utteljing: Vi fekk 60 000.- til å driva ”folkeleg diplomati”- utveksling av kvardagsliv og kultur mellom Jeriko og Lærdal.

Under besøket var Aesha og Wiam ein dag i Sogndal og drøfta studentstipendet på Høgskulen i Sogn og Fjordane. Dei hadde møte med internasjonal koordinator Ingve Lende, Jan Olav Fretland og rektor Åse Løkeland. Sistnemnde signerte ”International Partner Agreement”, og avtala vart nokre dagar etterpå også signert av Director Basem Shalash ved Al-Quds Open University i Jericho, slik at dei kunne lysa ut stipendet i Jeriko. 19 år gamle Razan Awajneh vartutteken. Ho fekk dessverre ikkje ordna alle formalitetane og teke ein engelsktest innan fristen, så stipendet måtte utsetjast til studieåret 2012-13.
Men Razan fekk ei flott førebuing til det da ho var med som ein av dei ni gjestene hit i oktober.

Under besøket i mars hadde Aesha og Wiam elles offisielle møte med Lærdal kommune og var på besøk i fleire heimar. Siste kvelden deira inviterte vi til open kveld med kveldsmat og lysbilde på ”Bedehuset”. Mange møtte fram og gjorde dette til
ein svært hyggeleg kveld både for gjestene og oss lærdølene. Takk til Lasse Sælthun som køyrde gjestene attende til Gardermoen, og ikkje minst vil vi takka Jon E. Tamnes og Hallvard Trohaug som let gjestene få bu gratis på Sanden
Pensjonat!

I vår laga vi i samarbeid med Lærdal Bibliotek til ei fin utstilling om vennskapsbyen og samarbeidet, med bilde og gjenstandar, litteratur om Jeriko og Palestina og det vi greidde å skaffa av palestinsk litteratur, omsett til norsk.
VJL gav to eksemplar av bøkene vi har i Jerikobui i gåve til biblioteket. Gerd Berit Tønjum, Ingrid Kristina Rio og Bente Opsvik stod for arbeidet.
Utstillinga er midlertidig, men står framleis på biblioteket. Hylla med palestinske bøker blir der permanent.

Hovudaktiviteten vår i år var besøk av ei stor gruppe frå Jeriko, 13.-20. oktober. Dei ni gjestene var  ”handplukka” ut frå innhaldet i søknaden vår, og det var ein svært ungdommeleg delegasjon som kom.
Dei to yngste er 12 og 13 år gamle, flotte representantar for Barnas kommunestyre i Jeriko! Dei andre representerte skuleministeriet, musikk/dans, Al-Khadewi-grendalaget som driv Lærdal Park, Jeriko kommune, var ungdommar og studentar. Kokken Jumah, som har hatt meir enn 60 lærdøler til middag i heimen sin i Jeriko, var invitert som heidersgjest av den store gruppa som var i Jeriko i fjor, og på kulturkvelden vart han utnemnd til æresborgar av Lærdal av
ordførar Sanden.

Gruppa hadde eit allsidig program, med turar, gards- og bedriftsbesøk, og besøk på alle skulane og barnehagane i bygda. Dei fekk oppleva både kultur og vakker vestlandsnatur: Borgund stavkyrkje, dei gamle vegane, tur med Flåmsbana og
hadde ei stor oppleving på båttur i lag med Rein Arne Golf. Dei var på middagsbesøk i mange heimar, og høgdepunktet vart ein flott kulturkveld siste kvelden, med norsk-palestinsk program i ein fullsett kultursal. Blant publikum
var alle fem ordførarane som har vore i Lærdal sidan vennskapen med Jeriko kom i gang. Gjestene budde godt på Lærdal Ferie- og Fritidspark, og vi takkar vertskapet der for god mottaking. Dugnadsgjengen med Berit Kaardal i spissen ordna frukost på ein god måte. Flott var det også at Bente Opsvik kunne vera med gjestene på tilbaketuren til Oslo. Dei stoppa og tende lys ved Utøya, og besøkte m.a. den palestinske ambassaden.

Resultat av besøket vonar vi mellom anna skal blir fleire personlege venner, vennskapsklassar og eit Jerikohjørne i Lærdal, slik Marwan føreslo siste kvelden. Vi ventar spent på konkrete planar frå Jeriko! Besøket vart godt dekt i pressa: To innslag i NRK-Sogn og Fjordane, tre reportasjar i Sogn Avis, ein i Helg og Kvardag og på nettstaden Porten.

Nokre av planane i år har vi ikkje greidd å realisera: CD-innspeling av musikken frå 10 000-årsjubileet i fjor vart både for kostbart og vanskeleg å realisera, og det var heller ikkje prioritert i vedtaket om økonomisk tilskott frå VNS. Vi tek med oss ideen vidare og ser om vi greier å få økonomisk støtte frå fleire kjelder seinare. Vi har heller ikkje fått laga den felles vennskapsbrosjyren,
men har i år heller prioritert arbeidet med heimesida http://jericholaerdal.org, Facebook-grupper og ei mindre brosjyre på norsk. Bente Opsvik gjer ein flott jobb med informasjonsarbeidet.
Kanskje brosjyren/heftet kan koma i samband med 15-årsjubileet vårt neste år?

Ei anna viktig sak vi har jobba vidare med, er å få samla lærestoff og laga lokale læreplanar om vennskapsbyen vår for skulane i Lærdal. Vi har delteke på eitt skuleleiarmøte, og vi ventar no på utspel frå pedagogisk leiar i Lærdal kommune,
som skal setja ned ei arbeidsgruppe på saka. Der skal vi delta.

I januar/februar presenterte Håkon Kvamme og Lasse Sælthun tanken om eit Lærdalshus i Jeriko.Dette er spennande tankar, som både vi i Lærdal og vennene våre i Jeriko tek med oss vidare.

Vi takkar elles Gerd Berit Tønjum, som stadig gjer eit godt og viktig arkivarbeid for oss! Vi takkar også reiseleiar Lasse Sælthun, som i samråd med styret alt er i gang med planar om ein ny tur til neste år. Vi tenkjer oss då eit opplegg som i fjor, der nokre reiser i offisielt vennskapsærend, medan andre i reisefølgjet er turistar og reiser heilt på eigen kostnad.

VJL vil elles retta ein varm takk til dei to kommunale representantane som no går ut av styret, avtroppande ordførar Arne Sanden og formannskapsmedlem Olaug Skjerdal. Dei har båe gjort ein stor innsats, og vi ynskjer dei velkomne i det
vidare vennskapsarbeidet!

Vennskap Jeriko-Lærdal takkar til slutt alle medlemmer og andre støttespelarar for innsatsen i eit aktivt år!  Styret har hatt ni styremøte, mange telefonar, e-postar og sms-ar. Leiaren vil for eiga rekning takka styremedlemmene for at alle er med og deler så godt på arbeid og ansvar.

Lærdal, 22. november 2011
For styret i Vennskap Jeriko-Lærdal
Anna Jorunn Avdem

Årsmøtet slutta seg eit tillegg til årsmeldinga.
Ein stor takk til Anna Jorunn Avdem for alt ho gjer for venskapsarbeidet og leiarskapet av laget.

Årsmøtet vedtok å auke medlemskontingenten for vaksne einskildmedlemmer til kr 150.
Annonse retta mot dei som har nettbank kjem i komande Helg&Kvardag.
Bankgiro 3838.13.52398  Husk å skrive medlemsnamn i merknadsfeltet.

Meir utfyllande informasjon kjem etterkvart her på verdsvevsida, -
og naturlegvis også sendt direkte til alle medlemmene.

ein del bilete frå besøket vert lagt ut her:
https://www.facebook.com/#!/pages/Vennskap-Jeriko-L%C3%A6rdal-Friendship-Jericho-Laerdal/221083580258

På vitjing på kontoret hjå ambassadør Yasser Najjar – eit hyggeleg og informativt besøk i ambassaden i Drammensvegen som nyleg opna  - tidlegare har det vore palestinsk representasjonskontor.

NORSK-PALESTINSK KULTURKVELD

I LÆRDAL KULTURHUS

TYSDAG 18.OKTOBER KL. 19.30 

Spennande kulturprogram
med gjestene frå Jeriko og elevar frå
kulturskulane i Lærdal og Aurland,
kvar for seg og i lag:
Musikk  -  dans -  dikt  -  presentasjon av Jeriko – helsingar
-  og ei overrasking!
GRATIS INNGANG
ALLE ER VELKOMNE!
Arr.: Lærdal kommune / Vennskap
Jeriko-Lærdal

Zeinah,  Queen, Alf jr, Razan, Arne, Lasse, Jumah, Mousa, Marwan, Mahmoud, Mujahed & Mohammed
Alle bileta er scanna frå laurdagens Sogn Avis
Etterkvart kom også verdsvevversjonen av artikkelen i Sogn Avis

Jumah og Marwan overrekkjer den offisielle gåva frå Jeriko kommune til rådmannen.

Jumah lagar kaffi på rådhuskantina til ordføraren og alle dei hine (Faksimile Sogn Avis 14.10. Klikk på biletet for større versjon).

Temaet for fredagen er  Lærdal kommune. Det inneber naturlegvis mellom anna vitjing på Rådhuset og møte med representantar frå Ungdomsrådet og naturlegvis spasertur rundt om på Øyri.

Seinare på dagen vert det vitjing på eit av dei store kraftverka i kommuna vår.

Torsdag 13. oktober kjem det storbesøk til Lærdal: Ni gjester frå sommarvarme Jeriko kjem på vennskapsbesøk til det haustkalde Lærdal.

Ei stor gruppe lærdøler var på jubileumsfeiring i verdas eldste by i fjor haust,
og no er det tid for gjenvisitt.

Vi er spesielt glade for at så mange ungdommar er med denne gongen:
Dei yngste er på 12 og 13 år og sit i Barnas kommunestyre i Jeriko.
Også andre ungdommar er med, mellom anna ei jente som har fått utvekslingsstipend og skal studera ved Høgskule i Sogndal neste år.
At barn og unge får kontakt er viktig i vennskapsarbeidet, derfor kjem det også ein representant frå skulekontoret i Jeriko.

For fyrste gong kjem også eit medlem i Al Khadewi ”grendalag” til
Lærdal. Dei har ansvaret for å drifta av Lærdal Park i Jeriko, og parken er ein
godt halden samlingsstad ikkje minst for ungane i området.
Ein video frå Lærdal Park  – Arve Uglum  – Nrk oktober 2010

Sjølve heidersgjesten i gruppa er gjestfrie Jumah. Mange hugsar nok han som bakaren på Lærdalsmarknaden i 2004.
- Etter at han var i Lærdal, har han invitert heim til seg alle lærdøler som har vore i Jeriko! No er vi mange som gler oss til at han skal koma på besøk til oss.

Gruppa har eit tettpakka program den veka dei skal vera her: På fredag
er dei Lærdal kommune sine gjester og har program både på rådhuset og elles på
Øyri. På laurdag skal dei oppover bygdi og mellom anna sjå Borgund Stavkyrkje,
og på søndag legg vi opp til tur med Flåmsbana og andre naturopplevingar i
Aurland.
Måndag og tysdag blir det besøk på skulane, barnehagane og kulturskulen, og
tysdagskvelden er både bygdafolk og palestinarar velkomne til ein stor
norsk-palestinsk kulturkveld i Kulturhuset.

Styret i Vennskap Jeriko – Lærdal oppmodar alle lærdøler om å nytta
høvet til å bli kjent med gjestene frå vennskapsbyen vår. Det er både spennande
og gjevande å knyta vennskapsband over grensene, og det er dessutan flott om
mange stiller opp og hjelper til under besøket. Vi treng sjåførar til å køyra
dei rundt på ulike aktivitetar, og både laurdagskvelden og måndagskvelden legg
vi opp til at gruppa kan dela seg og koma på besøk heim til alle dykk som
inviterer. Ikkje minst oppmodar vi ungdommane i bygda om å ta kontakt med
ungdommane som er på besøk. Dette er ein eineståande sjanse til å få nye
venner! Ring Anna Avdem 47 64 25 32 eller Bente Opsvik 906 46 008,
så formidlar vi kontakt!

Anna J. Avdem
Leiar i Vennskap Jeriko – Lærdal

Denne gongen er det fleire yngre jerikanarar som kjem, – mellom dei to representantar frå Barnas kommunestyre som er høvesvis 12 og 13 år,
ei som skal studere i Sogndal frå neste haust og to andre yngre vaksne.
Elles tilsette på skuleadministrasjonen og kommuneadministrasjonen og ein representant frå Al Khadewi-grendalaget, dei som tek seg av Lærdal Park.

Det vert lagt opp til eit breitt program for dei ni gjestene – med ein kulturkveld 18.oktober.

For oss som har vitja Jeriko, er det spesielt gledeleg at Jumah kjem.

Opningstidene på Lærdal Folkebibliotek
Måndag og onsdag 15-19
Tysdag og torsdag 12-16

Siste veka har det vakse fram ei utstilling
om vennskapsarbeid – Jeriko – Palestina – Midt Austen
på Lærdal Folkebibliotek på Lærdalsøyri skule.

Biblioteket har funne fram eit breitt utval av bøker og informasjon.
Det vert vist mange bilete frå Jerikoreiser og Jerikobesøk  og nokre av dei mange tekstilane og gåvene som Lærdal kommune har motteke sidan den første førehandsavtalen vart underskriven av Abed Al-Karum Sidr og Hans A. Tønjum.

Underskriving av førehandsavtalen 12 oktober 1997

10.000 år gamle murar måtte naturlegvis besiktigast av Formannskapet under den aller første Jerikoreisa i 1997.